KOMIKS. Nagbabalik an hilig kan mga Pilipino sa Komiks, kan ini gamiton ni Mar Roxas sa saiyang kampanya. Sa komiks, pig ladawan si Mar como herwe durante kan Yolanda duman sa Tacloban City. Tanda pa nyato kun gurano ka popular an komiks sa mga Bikolano ta kaidto dai pa uso an telebisyon, dai pa uso an FM, kaya an sikat kaidto iyo an radio na may mga dedication, estoryang suanoy, karantahan sa plaza asin drama. An karibal kan radyo iyo an komiks arog kan Pinoy Klasiks, Pilipino Komiks, Tagalog Klasiks, Hiwaga, Wakasan, Lagim, Liwayway asin Bulaklak. An mga parabasa na habo’ sa halawig na estorya na iguang “ itutuloy”, mas preferable ninda an Wakasan. Kun an parabasa mahilig sa mga estorya kan buhay ninda Susan Roces, Amalia Fuentes, Fernando Poe Jr, Romeo Vasquez, Jun Aristorenas kabale na sinda Tirso Cruz III asin Nora Aunor, ini saindang mababasa sa Liwayway asin Bulaklak, ta digdi man mahihiling an Pen-Pal Corner, o an paghanap nin magiging elosyon na taga ibang lugar. Kun an parabasa, may ugaling Pato o Kuneho, mas pipilion kaini an “Tiktik”. Saro sa makonsuelo sa pagbasa nin komiks, iyo an pag apreciar sa magayon na drawing kan mga ilustrador, asin duwa sa mga marhay na ilustrador sa Komiks iyo sinda Mar Santana asin Ben Maneclang.
CINCO PESOS bayad sa sarong hali’pot na estorya sa Komiks. Taon 75 kan mapili an sakuyang estorya asin napublikar sa Pinoy Klasiks, na iyo an nagdara sakuya sa kadikit na kasikatan sa samuyang Barrio. Nin huli ta yaon duman an sakuyang pangaran, gulping mga kadaragahan gikan sa ibang parte kan nacion an nagpadara sakuya nin surat. An estorya ko iguang titulong ESTELA, guno sa sarong magayon na kababata na tubong Pio del Pilar sa Makati, nagbabakasyon sa saiyang Lola sa Naga. Dara nin paghanga sa saiyang gayon, kaya namukna an estorya asin napili kan Editor kan Pinoy Klasiks. Sa paagi nin “money order” pig kua ko an tseke sa Post Office kaidto yaon pa sa Peñafrancia, an tseke pig paribay ko man sana sa Post Office sa kantidad na Cinco Pesos bastante na para ipamakal ko nin mga pagkakan kan Familya; an kayang mabakal kan cinco pesos iyo an duwang tsupa nin miracle rice, sarong sapad na sa’bang batag, sarong atado nin tinapa, sarong lata-lata nin balaw asin tinapay na pan Legazpi sa Quality. Para sakuya, maogma an magbasa nin komiks ta ini parte kan nakaugalian kan mga bikolano, mala ta paglimpoy nin hapon, nakapirila an mga parabasa sa gilid kan Supermarket ta nag aarkila nin Komiks ki Dela Rosa.
TURUDUKAN SA POLITIKO. Padikit-dikit nang dai nareresa an inaapod na turudukan sa panahon nin kampanya. An tudok, sarong sistema nin pagbenta kan voto alagad sa paagi nin paghagad nin kwarta o pabor. Kan si Popoy Hernandez, naglaog sa pulitika, joven asin guapo, mestizo malinig magdara nin bado kaya garo syang artista na pigsusunod nin mga tawo mantang nag totoytoy sa tulay na kahoy kan EL PARAISO sa Santa Cruz. Kan magdata’ an saiyang mga bitis sa kadagaan kan Paraiso, sarong bakla na bantog kaidto na para gutos nin natong, an tulos nagsurapot ki Popoy risadong naghanga ini sa kaguapohan kan kandidato. Mayo man siyang hinahagad ki Popoy kundi an pabayaan sana siyang magsurapot digdi na huna mo gutom na sawa, aram kan mga nagmamasid na kung nagkataon dai lang kandidato si Popoy, baka pinasukamang na si Bading. Kan si Popoy pinatukaw sa sarong natad kan saro nyang lider na babae, natuyawan ni Popoy an kabang na tsinelas ni Mamay… sabi ni Popoy, O Mamay, ta’no po ta kabang ang mga tsinelas mo? duman biglang nag upak nin sarong beses si Mamay, na garong iniisip nya, “remate ka Popoy ka” duman nagpoon an inaapod na turudukan, an simbag ni Mamay…”. Ika Popoy ta tinuyaw mo yan.. Pwes! bakalan mo ako nin bagong tsinelas”.